Тодорхойлолт
Энэхүү нумын тавиурыг Монгол үндэсний сурын харваа болон буриад, урианхай сурын харваанд хэрэглэх Монгол нум, сумыг хадгалах мөн Саран бай, зэвт харваанд хэрэглэгддэг хулсан нумыг сумтай нь хамт өлгөн хадгалахад ашиглана. Дээр өгүүлсэн олон төрлийн харваанд харваач хэд хэдэн төрлийн нум, сумыг ашигладаг. Тиймээс харваачид хамгийн багадаа хоёр болон түүнээс дээш нумтай байдаг. Тэгэхээр тэдгээр нум, сумыг эмх цэгцтэй, аюулгүй хадгалах хэрэгцээ үүснэ. Ерөнхийдөө нум сум хадгалах тавиур байх боловч ихэнх нь нэг юмуу эсвэл хоёр, гурван нум өлгөхөөс хэтрэхгүйгээр зохиомжлон хийсэн байдаг. Өөрөөр хэлбэл бусад нумын тавиуруудад олон нумыг нэгэн зэрэг өлгөн хадгалах боломж хязгаарлагдмал байдаг. Энэхүү шинэ бүтээсэн нумын тавиур нь чухамхүү энэ асуудлыг энгийн, авсаархан, үзэмжтэй, олон нум зэрэг өлгөн хадгалах боломжтойгоор зохиомжлон бүтээснээрээ онцлог юм. Энэхүү шинэ нумын тавиурыг анхнаасаа 2,4,6,8,9 хүртэл нум тавихаар зохиомжлон хийвэл хамгийн тохиромжтой . Тэрнээс олныг тавихаар хийсэн ч болох боловч гэрийн доторх зай талбайнаас хамаараад зохимж муутай юм уу гэж бодож байна.
Энэхүү нумын тавиур нь 3D загвартай буюу орон зайтай хийгдсэн нь олон нумыг тэдгээрт хэрэглэгдэх төрөл бүрийн сумтай нь хамт нэгэн зэрэг өлген хадгалах боломжийг олгож байна. Нумын тавиур нь малгай тавих, нум хадгалах, сум өлгөх гэсэн үндсэн 3 хэсгээс бүрддэг. Нумыг хадгалахдаа нэг эгнээнд 2 болон 3 нум эгнүүлэн байрлуулахаар зохиомжлон хийгдсэн. Ингэж байрлуулахдаа дээрээс доош налуу байрлалтай хийгдсэн нь цаана өлгөсөн нумыг төвөг багатай авах боломжийг бүрдүүлж өгч байна. Тийм байдлаар 2- 3 давхар хийгдэхээр 9 хүртэлх нумыг тавих боломжтой болж байгаа юм. Сумыг аль болох муруйлгахгүйгээр хадгалах ёстой. Тиймээс булцуугаар нь дүүжлэх байдлаар өлгөн хадгалдаг. Тус нумын тавиурт ханан талд 8-10 сум, 2 хажуу талын шургуулганд нийтдээ 10- 16 сум өлгөх бололцоотой. Мөн тавиурын завсар хооронд сумыг хэвтээ байдлаар бас тавьж болно. Жишээлбэл зэвт харваанд хэрэглэгддэг булцуугүй шулуун сумыг энэ хэсэгт байрлуулан хадгалахад тохиромжтой.
Нумын тавиурыг модоор хийсэн бөгөөд 11 төрлийн олон тооны жижиг хэсгээс бүтдэг. Мөн олон тооны сумыг янз бүрийн байрлалаар өлгөн хадгалаж болдогоороо бусад нумын тавируудаас эрс ялгаатай. 4 болон 6 нумыг тавьж, 20-оос дээш тооны сумыг өлгөх боломжтой.
| Томьёолол | Тодорхойлолот |
|---|---|