Халх хувцас нь нийт монгол үндэстний нийтлэгийг тусгадаг онцлогтой. Халх малгайг улирлынх, гоёлынх гэж ангилахаас гадна эрэгтэй, эмэгтэй, хүүхдийн гэж хийх гоёл чимэг, хэмжээ байдлаар нь ангилна. Халх эмэгтэйн дээлийн ханцуй нь хоргой тууз алаглуулсан эрээн гоёлтой, ханцуйны уг мөрнөөс дээш илүү гарсан мөртэй, түүн дотор дэрсэн нум бүхий цардсан эсгий болон тэмээний ноос чихэж түмбийлгэсэн түнтгэр мөртэй байх онцлогтой. Мөн дээлийн хормойн баруун зүүн хоёр доод талд оноо гаргах энгэр хормойг тойруулан хэдэн үе үелэн эрээн туузаар эмждэг. Харин эрэгтэй дээл тэрлэгний хормой ханцуй урт, энгэр захны омог даруу, тасам дан, товч шилбэ тохирсон тоотой хийнэ. Бидний уран зангиааны утсаар хийж буй халх хүүхэлдэйн толгойн гоёл, дээл, үс, гутал, зэрэг нь Монгол өв соёлыг багтаасан чамин, бүтээлч, гайхалтай харагддаг. Зангилаа нь хэд хэдэн үндсэн техниктэй, үүнд хавтгай зангилаа, зүүн тийш мушгирсан, баруун тийш мушгирсан, шатархсан, жимсхэн зангилаагаас гадна тоон туших, товч зангидах гогцоодох зангилааг ашиглан орчин үеийн загварт оруулан урлагдсан. Энэхүү техникүүдийг ашиглаад уран сэтгэмж, оюун ухаан, төсөөлөн бодох чадвараа ашиглан монгол дээлний товчноос эхлүүлээд бүгдийг хийдэг. Уран зангилааг ашиглаад бүтээж болохгүй зүйл гэж үгүй билээ. Уран төсөөллөө бодитой болгох бүрэн боломжтой юм шүү.