Товч тайлбар
Энэхүү шинэ бүтээл нь гидрометаллургийн салбарт хамаарч, молибдений баяжмал дахь хольц нэгдлүүдийг уусган салгаж, өндөр цэвэршилттэй молибдений дисульфид (МоS₂)-ыг гарган авахад ашиглагдана. Цэвэршил өндөртэй МоS₂-ыг хуурай тос, тослох материал болон молибдений бусад нэгдлийг үйлдвэрлэх үндсэн түүхий эдээр ашиглана. Мөн 2D шилжилтийн металлын дихалькогены төлөөлөл болох MoS₂-ыг транзистор, гэрлэн диод, нарны зай, нанотуб, фотосенсор зэрэг өндөр технологийн электрон техникийн эд анги хийх, моно кристалл ургуулахад ашигладаг. Түүнчлэн энерги хадгалах, хувиргах, устөрөгч ялгаруулах (HER), литийн болон натрийн батерейны электродын материал, нано-эрчим хүчний төхөөрөмжүүдэд хэрэглэнэ.
Уг арга технологийн дагуу 1 тн молибдений баяжмалыг уусган цэвэршүүлэхэд 800- 850 кг эцсийн бүтээгдэхүүн (98%-иас дээш MoS₂) үүсэх ба баяжмал дахь МоS₂-ын агуулгыг >14%-иар нэмэгдүүлэх боломжтой юм.

Томьёолол
1. Молибдений баяжмал дахь молибдений дисульфидын агуулгыг нэмэгдүүлэх аргын ялгаа нь
- Молибдений баяжмалаас зэс, төмөр, цахиур агуулсан эрдсүүдийг 3 алхамаар дараалуулан уусгах,
- 84%-иас багагүй MoS₂ агуулсан молибдений баяжмалыг 3 алхамаар цэвэршүүлэхэд 98.5% агуулгатай MoS₂ бүхий баяжмал бэлэн болох,
2. Томьёолол 1 дүгээрийн ялгаа нь баяжмал дахь зэсийг төмрийн хлоридын холимог уусмалаар уусгах нөхцөл нь FeCl₃-10% ба FeCl₂-30%, хатуу шингэний харьцаа 1:10, температур 100°C, эргэлтийн хурд 300 эрг/мин, хугацаа 240 минут бөгөөд зэс нь зэсийн хлорид хэлбэрээр уусмалд шилжинэ.
3. Томьёолол 1 дүгээрийн ялгаа нь зэсийг уусгасан хатуу үлдэгдлээс төмрийг азотын хүчлийн 4М уусмалаар, хатуу шингэний харьцаа 1:5, температур 30 °С-аас ихгүй, хугацаа 60 минут нөхцөлд уусган төмрийн нитрат хэлбэрээр уусмалд шилжүүлнэ.
4. Томьёолол 1 дүгээрийн ялгаа нь төмрийг уусгасан хатуу үлдэгдлээс цахиурыг хайлуур хүчлийн уусмал (HF:H₂O = 1:1)-аар уусгах нөхцөлийн температур 80 °С-аас ихгүй, хугацаа 120 минут байна. Уусмалд цахиур нь H₂SiF₆ хэлбэрээр шилжинэ.