Товч тайлбар:
Таргалалтын эсрэг, эрүүл мэндийг дэмжих пробиотик бэлдмэл нь зохицуулах үйлчилгээтэй хүнсний үйлдвэрлэлийн салбарт хамаарна.
Шинэ бүтээл нь уламжлалт анагаах ухаанд уушгины үрэвсэлт өвчин, сүрьеэгийн үед болон биеийн ерөнхий тамир тэнхээг сайжруулах, хоол боловсролтыг сайжруулах зорилгоор хэрэглэгдэж байсан гүүний айраг, ингэний хоормогийн биологийн үнэт чанарыг нөхцөлдүүлэгч биологийн өндөр идэвхтэй, пробиотик сүүн хүчлийн бактериудыг ялган авч, тэдгээрийг амин дэмээр баялаг шар буурцгийн сүүнд исгэх технологийн горимыг боловсруулж, исгэлтийн дараа хөлдөөн хатаах аргаар хуурайшуулан, биед үйлчлэх ашигтай тунг тогтоон бүтээгдэхүүн хэлбэрт шилжүүлсэн. Пробиотик сүүн хүчлийн бактериуд гэдэсний микрофлорын олон янз байдлыг нэмэгдүүлж, бодисын солилцооны явцад богино гинжит тосны хүчлүүд, линолейны хүчил, гамма-аминобутирын хүчил зэрэг бага молекулт биологийн идэвхт нэгдлүүдийг үүсгэдэг. Эдгээр нь хүний бодисын солилцооны зохицуулгад оролцож, таргалалт, илүүдэл өөх тосыг бууруулах, дархлааг дэмжих, хоол боловсруулалтыг сайжруулах, цусанд дахь сахарын хэмжээг зохицуулах үйлчилгээтэй. Ялангуяа таргалалтын үед сүүн хүчлийн бактериуд липополисахаридаар өдөөгдсөн үрэвслийг бууруулж, богино гинжит тосны хүчлүүдийг үүсгэснээр богино гинжит тосны хүчлүүд лептины нийлэгжилтийг нэмэгдүүлэн улмаар хоолны дуршлыг бууруулах, липидийн солилцоо, энергийн зохицуулагатай холбоотой дохионы замыг зохицуулах замаар липидийн нийлэгжилтийг дарангуйлснаар энергийн зарцуулалтыг нэмэгдүүлж, өөх тосны хуримтлалыг бууруулдаг байна. Lactobacillus fermentum BM-325, Lactobacillus paracasei X-1, Lactobacillus paracasei X-17 өсгөврүүд нь хоол боловсруулах эрхтний ходоодны хүчил, цөстэй орчинд тэсвэртэй, өвчин үүсгэгч Грам эерэг, Грам сөрөг бактериудын эсрэг идэвхтэй, мөн уураг задлах протеолитик идэвхтэйг судлан тогтоосон. Үүнээс гадна дээрх 3 омгийн сүүн хүчлийн бактериудын өргөн хэрэглээний 8 төрлийн антибиотикт тэсвэртэй чанарыг судлан тогтооход тэсвэртэй байсан бөгөөд энэ нь тус бүтээгдэхүүнийг антибиотик эмчилгээний үед болон дараа биеийн хэвийн микрофлорыг хадгалах, нөхөх зорилгоор хэрэглэх боломжтойг харуулж байна. Фармакологийн туршилтын дүнд Lactobacillus fermentum BM-325, Lactobacillus paracasei X-1, Lactobacillus paracasei X-17 өсгөврүүд таргалалт эсрэг идэвхийг in vivo-д судлахад биеийн жин бууруулах, цусан дахь глюкоз, өөх тосны хэмжээг тогтворжуулах нөлөөтэй үзүүлж байгааг тогтоосон.
Томьёолол:
1. Таргалалтын эсрэг, эрүүл мэндийг дэмжих пробиотик бэлдмэлийн найрлага, бэлтгэх аргын ялгаа нь уламжлалт айраг, хоормогноос ялгасан биологийн өндөр идэвхтэй Lactobacillus fermentum BM-325, Lactobacillus paracasei X-1, Lactobacillus paracasei X17 зүйлийн сүүн хүчлийн бактериудыг шим тэжээлийн чухал эх үүсвэр шар буурцгийн сүүнд тохиромжтой харьцаагаар найруулж өсгөвөрлөн 6 цаг өсгөвөрлөж, биологийн идэвхийг нэмэгдүүлсний дараа хөлдөөн хатаах аргаар хуурайшуулан бэлтгэнэ.
2. Аргын томьёоллын 1 дүгээрийн ялгаа нь бүтээгдэхүүний үндсэн найрлага сүүн хүчлийн бактериудыг 121ºС-т 15 мин ариутгаж, 30ºС хүртэл хөргөөж бэлдсэн шар буурцгийн сүүнд тус бүр 100мг/мл концентрацитайгаар тарьж 37ºС-т 6 цаг өсгөвөрлөнө.
3. Аргын томьёоллын 2 дугаарын ялгаа нь өсгөвөрлөж бий болсон бүтээгдэхүүнийг холигчоор сайтар хутгаж хөлдөөн хатаах аргаар хуурайшуулж пробиотик бактерийн нунтаг бэлдмэл болгоно.
4. Найрлагын томьёоллын 1 дүгээрийн ялгаа нь 1кг пробиотик бактерийн нунтаг бэлдмэл дээр 80 г глюкоз, 50 г магнийн стеарат нэмж 10 минут хүртэл хугацаанд хутгаж бэлтгэнэ.
5. Найрлагын томьёоллын 1 дүгээрийн ялгаа нь хольж бэлтгэсэн бүтээгдэхүүнийг савлагч машины тэжээгчид хийж 1 граммаар уутлан бэлэн бүтээгдэхүүн болгож бэлтгэнэ.
6. Найрлагын томьёоллын 1 дүгээрийн ялгаа нь 1 г бүтээгдэхүүнд агуулагдах орц, найрлага дараах хэмжээтэй агуулагдана.
Lactobacillus paracasei X-1 -0.1 г
Lactobacillus paracasei X-17 -0.1 г
Lactobacillus fermentum BM-325 -0.1 г
Глюкоз -0.08 г
Магнийн стеарат -0.05 г
Шар буурцгийн хуурайшуулсан сүү -0.57 г